Arne Slot រំពឹងថា Salah មិនទៅណា និងបន្តនៅជាមួយ Liverpool រយៈពេលវែង

អ្នកចាត់ការ Liverpool លោក Arne Slot បាននិយាយថា ក្លិបរំពឹងថា Mohamed Salah នឹងបន្តស្នាក់នៅ Anfield រយៈពេលវែងបន្តទៀត។ ​កីឡាករវ័យ 32 ឆ្នាំដែលនឹងផុតសុពលភាពកិច្ចសន្យារបស់ខ្លួនជាមួយ Liverpool ក្រោយចប់រដូវកាលនេះ ធ្លាប់បាននិយាយកាលពីខែវិច្ឆិកាថា មានការខកចិត្តជាមួយ Liverpool

ដែលមិនគិតពីការបន្តកិច្ចសន្យាថ្មីដល់រូបគេ។
​ខ្សែប្រយុទ្ធអេស៊ីបរូបនេះបានបង្ហាញទម្រង់លេងអស្ចារ្យរបស់ខ្លួននៅពេល Liverpool ស្មើនៅទឹកដី Newcastle 3-3។

​និយាយក្រោយចប់ការប្រកួតនោះលោក Arne Slot ឱ្យដឹងថា នៅពេលគិតដល់រឿងស៊ុតបញ្ចូលទី ពួកយើងគិតពី Salah ហើយយើងសង្ឃឹមថា Salah នឹងបន្តជាមួយពួកយើងដើរវែងឆ្ងាយទៀត។

​មិនខុសពីលោក Arne Slot ឡើយ អ្នកវិភាគបាល់ទាត់នៅ Premier League ជាច្រើនបានលើកឡើងថា Liverpool ត្រូវតែទុក Salah នៅបន្ត។

​ក្រឡេកមកមើលស្ថិតិរបស់កីឡាករអេស៊ីបរូបនេះកត់ត្រាដោយ Opta ប្រៀបធៀបនឹងខ្សែប្រយុទ្ធផ្សេងទៀតរបស់ក្លិប គិតពីគ្រាប់បាល់បញ្ចូលទីតាំងពី Salah មកដល់ឃើញថា Mohamed Salah រកបាន 226 គ្រាប់ Sadio Mane 120 គ្រាប់ Roberto Firmino 100 គ្រាប់ Diogo Jota 60 គ្រាប់ និង Darwin Nunez 36 គ្រាប់។

​គិតពីគ្រាប់បាល់បញ្ចូលទី និងការបញ្ជូន Mohamed Salah 325 Roberto Firmino 162 Sadio Mane 157 Alexander-Arnold 102 និង Diogo Jota 81៕