គ្រូកម្ពុជារំពឹងកូនក្រុមអាចរកលទ្ធផលល្អជូនអ្នកគាំទ្រ ពេលជួបទីម័រល្ងាចនេះ

ក្រុមជម្រើសជាតិកម្ពុជា នឹងបើកទ្វារពហុកីឡដ្ឋានជាតិ ទទួលក្រុមជម្រើសជាតិទីម័រខាងកើត វេលាម៉ោង 5៖45នាទីល្ងាចថ្ងៃទី17 ខែធ្នូ 2024 ក្នុងពានរង្វាន់បាល់ទាត់អាស៊ាន ឆ្នាំ2024 ស្របពេលលោក Koji Gyotoku គ្រូបង្វឹកក្រុមគោព្រៃកម្ពុជា នៅតែមានជំនឿចិត្តយ៉ាងមុតមាំថា កូនក្រុមនឹងអាចដណ្ដើមលទ្ធផលល្អជូនអ្នកគាំទ្រ។

ថ្លែងក្នុងសន្និសីទសារព័ត៌មានមុនការប្រកួតលោក Koji បានគូសបញ្ជាក់ថា នេះគឺជាការប្រកួតទី3 ក្នុងពូលA ខណៈ 2ប្រកួតកន្លងមក ក៏មិនអាក្រក់ពេកដែរ ។ ការណ៍នេះ លោកនឹងព្យាយាមរៀបចំក្រុម និងខិតខំប្រឹងប្រែងឲ្យអស់ពីសមត្ថភាព ដើម្បីទទួលបានជ័យជម្នះ ក្នុងការប្រកួតទល់នឹងក្រុមភ្ញៀវទីម័រខាងកើត ក៏ដូចជាការប្រកួតចុងក្រោយជាមួយក្រុមជម្រើសជាតិថៃ ។

បុរសជនជាតិជប៉ុនដដែលបន្ដថា ទោះបីកីឡាករមួយចំនួនបានរងរបួស មិនអាចបន្ដការប្រកួតក្នុងព្រឹត្តិការណ៍នេះបានក៏ពិតមែន តែក្រុមនៅមានកីឡាករផ្សេងៗ ដែលមានសមត្ថភាពប្រហាក់ប្រហែលអាចជំនួសតំណែងពួកគេ ហើយលោកមានជំនឿចិត្តយ៉ាងមុតមាំលើក្រុមជម្រើសជាតិកម្ពុជាថា នឹងអាចដណ្ដើមបានលទ្ធផលល្អជូនអ្នកគាំទ្ររបស់ខ្លួន ។

ចំណែកគ្រូបង្វឹកក្រុមទីម័រខាងកើត លោក Simon Elisettche វិញ បានសម្ដែងក្ដីរីយរាយ ដែលបានមកលេងជាមួយក្រុមជម្រើសជាតិកម្ពុជា ដែលជាក្រុមកំពុងមានការវិវឌ្ឍន៍រីកចម្រើន ។ យ៉ាងណាការប្រកួតបញ្ចប់ពូលA របស់ខ្លួននេះ លោកសង្ឃឹមថា ក្រុមជម្រើសជាតិទីម័រខាងកើត នឹងខំប្រឹងឲ្យអស់ពីសមត្ថភាព ដើម្បីដណ្ដើមលទ្ធផលល្អ និងទទួលបាន 3ពិន្ទុត្រឡប់ទៅផ្ទះវិញ ។

គួរដឹងថា បច្ចុប្បន្នកម្ពុជា កំពុងឈរលេខ4 ក្នុងពូលA ដោយរក្សា 1ពិន្ទុក្នុងដៃ ក្រោយប្រកួតបើកឆាកស្មើក្រុមភ្ញៀវម៉ាឡេស៊ី 2-2 និងប្រកួតទី2 ចាញ់ម្ចាស់ផ្ទះសិង្ហបុរី 2-1 ។ កម្ពុជានៅសល់ឱកាសស្ដួចស្ដើងដើម្បីប្រជែងកៅអីវគ្គបន្ដ ដ្បិតនៅសល់ 2ប្រកួតទៀត ដោយត្រូវជួបក្រុមភ្ញៀវទីម័រខាងកើតល្ងាចនេះ និងត្រូវធ្វើដំណើរទៅជួបក្រុមម្ចាស់ផ្ទះថៃ នាថ្ងៃទី20 ខែធ្នូខាងមុខ ។ ទោះសល់ឱកាសតិចតួច តែលោក Koji បានដាក់គោលដៅនឹងព្យាយាមស្វែងរកលទ្ធផលល្អឲ្យបានពីការប្រកួតសេសសល់នេះ ៕