តារាវ័យក្មេងកូរ៉េ Yang Min-hyeok ទទួលបានកុងត្រាពី Spurs មកចូលរួមជាមួយ Son

ខ្សែបម្រើស្លាបកូរ៉េ Yang Min-hyeok បានចាកចេញពីទឹកដីកំណើតមកកាន់ទីក្រុងដ៍ចក្រភពអង់គ្លេសហើយ ដើម្បីចូលរួមជាមួយក្លិបបាល់ទាត់ Tottenham Hotspurs ដែលនឹងត្រូវរួមអាជីពជាមួយរាមច្បង Son Heung-min ។ វ័យត្រឹម 18 ឆ្នាំ Yang Min-hyeok គឺជាកីឡាករកូរ៉េវ័យក្មេងបំផុតដែលផ្លាស់មកកាន់ Spurs ។

Spurs បានចុះហត្ថលេខានាំយក Yang ពីក្លិបកូរ៉េ Gangwon FC កាលពីខែកក្កដា ក្នុងកិច្ចសន្យារយៈពេល 6 ឆ្នាំដល់ឆ្នាំ 2030។ តាមកិច្ចព្រមព្រៀងកីឡាករវ័យ 18 ឆ្នាំរូបនេះ ត្រូវផ្លាស់មកកាន់ Spurs ក្នុងខែមករាខាងមុខ តែបានមកដល់មុន 2 សប្តាហ៍លឿនជាងការគ្រោងទុក។

កីឡាករយុវជនរូបនេះបានបង្ហាញទាំង 38 ប្រកួតពេញក្នុងឆ្នាំ 2024 នេះជាមួយ Gangwon FC ស៊ុតបញ្ចូលទីបាន 12 គ្រាប់ ជួយក្រុមបញ្ចប់ជាជើងឯករងលីគកំពូលកូរ៉េ K League 1។

Yang បានសារភាពថា មានអារម្មណ៍ថប់បារម្ភមុនពេលហោះហើរ 14 ម៉ោងរបស់ខ្លួន ប៉ុន្តែក៏មានអារម្មណ៍ទន្ទឹងរង់ចាំឱកាសលេងជាមួយប្រធានក្រុម Spurs និងជារាមច្បង Son Heung-min ដែលជាកីឡាករកីឡាដ៏ពេញនិយមបំផុតនៅប្រទេសកូរ៉េ៕