កីឡាករ​ម្ចាស់ផ្ទះ​អារ៉ាប៊ីសាអ៊ូឌីត​ ឈ្នះដំណាក់កាលទី 2 នៅ Dakar Rally

កីឡាករប្រណាំងរថយន្តរបស់ម្ចាស់ផ្ទះអារ៉ាប៊ីសាអ៊ូឌីត Yazeed Al-Rajhi បានប្រជែងឈ្នះដំណាក់កាលទីពីរដែលចំណាយពេល 2 ពីរថ្ងៃរឺ 48 ម៉ោង នៃការប្រណាំងរថយន្តចំងាយឆ្ងាយ Dakar Rally ស្របពេលដែល Henk Lategan ឡើងនាំមុខគេក្នុងតារាងវេលារួម។ Al-Rajhi ដែលជិះឱ្យក្រុមប្រណាំង Racing Toyota

​បានបញ្ចប់ដំណាក់កាលទីពីរដែលមានចំងាយផ្លូវសរុប 967 គីឡូម៉ែត្រដោយចំណាយពេល 10 ម៉ោង 56 នាទី 54 វិនាទី ពោលគឺមកដល់ទីព្រ័ត្រចុងក្រោយលឿនជាងអ្នកលេខពីរ Henk Lategan 4 នាទី 16 វិនាទី ខណៈលេខបីបានទៅកីឡាករជើងចាស់កាតា Nasser Al-Attiyah។

​សរុបមកវិញ គិតត្រឹមដំណាក់កាលទីពីរនេះ Henk Lategan ដែលជិះរថយន្ត Toyota ដែរនោះ ជាអ្នកនាំមុខគេបណ្តោះអាសន្នលើអ្នកឈ្នះដំណាក់កាលទីពីរ Al-Rajhi និងលេខបី Nasser Al-Attiyah។

​ចំណែកឯកីឡាករអូស្រ្តាលី Toby Price និងកីឡាករអង់គ្លេស Sam Sunderland ដែលធ្លាប់ឈ្នះជើងឯក Dakar Rally នេះពីរលើកដូចគ្នានៅផ្នែកម៉ូតូនោះ បច្ចុប្បន្នបានក្លាយជាមិត្តរួមក្រុមនឹងគ្នាជាមួយក្រុមប្រណាំង Overdrive Racing ផ្នែករថយន្តវិញ និងកំពុងឈរលេខបួនក្នុងតារាងវេលារួម។

​ងាកមកការប្រកួតផ្នែកម៉ូតូវិញ កីឡាករអូស្រ្តាលី​ Daniel Sanders បានយកឈ្នះបីដំណាក់កាលផ្ទួនពោលគឺឈ្នះដំណាក់កាលបើកឆាក និងដំណាក់កាលទីមួយទីពីរ ហើយនៅពេលនេះកាន់វេលាចំណេញនាំមុខគេដល់ទៅ 12 នាទីកន្លះ លើកីឡាករអាមេរិក Skyler Howes និងលេខបីកីឡាករបុតស្វាណា Ross Branch។ សំរាប់ដំណាក់កាលទី 3 ថ្ងៃអង្គារនេះមានចំងាយផ្លូវ 495 គីឡូម៉ែត្រ៕