សញ្ញាល្អមុន Australian Open! Sabalenka គ្រងជេីងឯក Brisband International

កីឡាការិនីវាយកូនបាល់លេខមួយពិភពលោក Aryna Sabalenka បានចាប់ផ្តើមរដូវកាល 2025 យ៉ាងល្អ ជាពិសេសគឺការត្រៀមលក្ខណៈក្នុងការការពារតំណែងជើងឯក Grand Slam, Australian Open តាមរយៈជ័យជំនះនៅកម្មវិធី Brisbane International ចុងសប្តាហ៍កន្លងទៅ។ កីឡាការិនីវ័យ 26 ឆ្នាំមកពីបេឡារុសរូបនេះត្រូវបាន

គូប្រកួតកីឡាការិនីរុស្ស៊ី Polina Kudermetova យកឈ្នះមួយសិតមុន 4-6 មុនពេលដែលវាយបកយកឈ្នះពីរសិតផ្ទួនៗ 6-3 និង 6-2 លើកីឡាការិនីលំដាប់លេខ 107 ពិភពលោកមកពីវគ្គជម្រុះ។

កាលពីឆ្នាំ 2024 Sabalenka បានរងបរាជ័យនៅវគ្គផ្តាច់ព្រ័ត្រ Brisbane International នេះក្រោមស្នាដៃកីឡាការិនី Elena Rybakina តែក្រោយមកក៏បានឈ្នះជើងឯក Australian Open។

ចំណែកការប្រកួតផ្នែកបុរសវិញ ជើងឯកបានទៅកីឡាករឆេក Jiri Leheckaក្រោយគូប្រកួតវគ្គផ្តាច់ព្រ័ត្រកីឡាករអាមេរិក Reily Opelka សម្រេចបោះបង់ការប្រកួតនៅសិតដំបូងដោយសាររបួស។

Jiri Lehacka បាននាំមុខក្នុងសិតដំបូង 4-1 មុនពេលកីឡាករវាយសេវាខ្លាំងរបស់អាមេរិកសម្រេចចិត្តឈប់។
Opelka ធ្លាប់មានរបួសដែលធ្វើឱ្យគេខកខានការប្រកួតជាច្រើនក្នុងរយៈពេលពីរឆ្នាំចុងក្រោយដោយសាររបួស កដៃ និងត្រគាក តែមានការប្រកួតដ៏អស្ចារ្យនៅ Brisbane នេះ ដោយបានទំលាក់ Nova Djokovic នៅវគ្គពាក់កណ្តាលផ្តាច់ព្រ័ត្រ។

ព្រឹត្តិការណ៍ Grand Slam ដំបូងប្រចាំឆ្នាំ Australian Open នឹងចាប់ផ្តើមនៅ Melbourne Park ថ្ងៃអាទិត្យទី 12 ខែមករានេះ៕